jeudi 23 décembre 2010

بزقة

هي بزقة وحدة ، اقسموها بينات بعضكم اشطار ، و لو انو عددكم كبير، اما ميسالش ، القناعة كنز لا يفنى... نبداو على بركة البوعزيزي الليستة :

- تفوه على كل واحد عيط باسم الحرية ليل و نهار، و نهارة اللي ولد بلادو تكتف و تظلم، غم على راسو و قال : "خاطيني أنا ، مانيش من المهمشين"

- تفوه على كل واحد غاضتو العراق و فلسطين و نيكاراغوا و نهار اللي الظلم شاعل يحرق في بلادو ، غم على راسو و قال "الحرية كان لفلسطين"

- تفوه على كل من طلع لمسرح و غنى و هدا غناياتو للشعب الأرمني و الشعب الأوزباكستاني ، و فرد نهار ولاد بلادو غارقين مقطعين بين الظلام و اللاكريموجين و غم على راسو و قال "نغني للشعب المسكين"

- تفوه على كل كلب طحان هز الستيلو و كتب ع الحالة الشاذة المنعزلة متع شاب ما حقوش يتقهر م الظلم اللي ما فماش في بلاد تعيش فيها زاهي فرحان سلطان في زمانك، و نكر في العباد اللي تدافع على حقها باش تعيش و كتب عليهم تمنييك أخضر ع الصباح و غم على راسو و قال "ماهو يسكرو افامهم كي الأخرين"

- تفوه ع اللي عمَر و و ضرب ولاد بلادو بالكرطوش الحي و باللاكريموجين و مدَ يدَو على ولد بلادو و دكَو في الحبس فماش ما يسكَر جلغتو ، و صاح و سبَ و عفس و حرق و غم على راسو و قال "سيدي هانا طايعين"

- تفوه ع اللي سرق و كذب ، ما خلا في البلاد بلاصة لغيرو، نقَص النعمة و فرَق النغمة، وزَع الكذب على الجواعة و نكر عليهم حقهم في بلادهم، حقهم في حياتهم، و حقهم في الغضب، و غم على راسو و قال "أنا المعلَم ، و نيك أم الأخرين"

- تفوه علي أنا شادد ستيلو و نكتب في بلاصة ما نهبط نهد القصور و العسَاسة ، و تفوه عليك يا اللي تقرا، و تغم على راسك و تقول "وزَر روحو، مسكين"

بزقة واحدة في وجوه الكل ، و حتي بزقة برشة فيكم.

12 commentaires:

  1. تفوه عاللي قرا هذا الكل و مازال غامم على راسو

    RépondreSupprimer
  2. ليكس هالبزقة ايه فينا و علينا

    RépondreSupprimer
  3. أول بزقة تعجبني، و نقول لمولاها زيدني نفيقش!

    RépondreSupprimer
  4. 3aziz chbaha lmoudawna hadhi ltaw lat 7ajbet?!

    tfih zada 3la 3ammar li ma3adech 9ayem bil wajeb!

    RépondreSupprimer
  5. wenti cha3malt à part el t5arbich fel blog wel baz9an 3al mouwatnin ?

    RépondreSupprimer
  6. Elyoum hbatt lel chara3 crier ma rage et revendiquer ma solidarité avec #sidibouzid w bza9t live .. et autres choses :)

    RépondreSupprimer
  7. Oh ça change tout hihi sa77itek ya rajjel :)

    RépondreSupprimer
  8. ce que tu dis est encore d’actualité
    tfouh 3lik ou 3lina ajma3iin

    RépondreSupprimer